نہج البلاغہنہج البلاغہ لائبریری

شرح خطبہ شقشقیہ نہج البلاغہ

شارح: شہید ثالث علامہ سید نور اللہ شوشتری رحمۃ اللہ علیہ

﷽

علامہ قاضی سید نور اللہ شوشتریؒ 956ھ بمطابق 1549ء میں ایران کے صوبہ خوزستان کے علاقے شوشتر میں پیدا ہوئے۔ آپ نے مشہد میں تعلیم حاصل کی۔ حالات سے مجبور ہو کر 992 یا 993ھ میں مشہد سے ہندوستان تشریف لائے۔

مغل بادشاہ جلال الدین اکبر نے آپ کے علمی مقام اور دینی خدمات کے اعتراف میں آپ کو قاضی القضاۃ مقرر کیا۔ اکبر بادشاہ کی وفات کے بعد اس کا بیٹا نور الدین جہانگیر تخت نشین ہوا تو دربار کے حالات بدل گئے۔ بعض متعصب علماء نے بادشاہ کے سامنے آپ کے خلاف شکایات پیش کیں اور آپ کی شہرہ آفاق کتابوں ”احقاق الحق و ازہاق الباطل“ اور ”مجالس المؤمنین“ کو بنیاد بنا کر آپ پر کفر و رفض کے فتوے عائد کیے۔ یوں آپ کو سزائے موت سنائی گئی۔

17 ربیع الاول 1019ھ بمطابق 1610ء کو آگرہ میں آپ کو خاردار کوڑوں سے اس قدر مارا گیا کہ آپ نے جامِ شہادت نوش فرمایا۔ آپ کا مدفن بھی ہندوستان کے شہر آگرہ میں ہے۔ علامہ میر حامد حسین موسوی، صاحبِ عبقات الانوار، نے اپنے دور میں آپ کی قبر تعمیر کروائی، جبکہ ناصر الملت سید ناصر حسینؒ نے اس پر مزید تعمیراتی کام کروایا۔ انہوں نے آپ کے حالاتِ زندگی بھی تحریر کروائے اور خود آگرہ میں شہیدؒ کے پہلو میں دفن ہونے کی وصیت کی۔ چنانچہ ان کی تدفین بھی وہیں ہوئی۔

مکتبِ اہلِ بیت علیہم السلام کے دفاع اور تعلیماتِ محمدؐ و آلِ محمدؑ کی ترویج کے سلسلے میں شہیدؒ کی 109 کتابوں کا ذکر ملتا ہے، جن میں سے ”احقاق الحق“ کو سب سے زیادہ شہرت حاصل ہوئی۔ احقاق الحق آیت اللہ العظمیٰ سید شہاب الدین مرعشی نجفیؒ کے حواشی کے ساتھ 39 جلدوں میں شائع ہو رہی ہے۔

شہیدؒ نے اپنی کتاب ”احقاق الحق“ اور دیگر تصانیف میں امیرالمؤمنین علیہ السلام کی مظلومیت کا بار بار ذکر کیا ہے۔ اسی ضمن میں آپ نے نہج البلاغہ کے تیسرے خطبے، یعنی خطبۂ شقشقیہ، کا بھی حوالہ دیا ہے۔

”مرکز بین المللی مائیکرو فلم، نئی دہلی“ کے ذریعے ایک تحریر دستیاب ہوئی ہے، جسے علامہ سید نور اللہ شوشتریؒ کی شرحِ خطبۂ شقشقیہ قرار دیا گیا ہے۔

18 صفحات پر مشتمل اس شرح کے آغاز میں لکھا ہے: ”کلام بزرگوار میر نور اللہ شوشتری“۔

تحریر اگرچہ زیادہ واضح نہیں، تاہم اس کے آخر میں کاتب نے لکھا ہے:

”تمت شرح الخطبۃ الجلیلہ بخط احقر بندگان آل عبا محمد اسحاق الرضوی المشہدی“۔

اس تحریر میں کہیں بھی کوئی تاریخ درج نہیں ہے۔

فارسی زبان میں لکھی گئی یہ مختصر ”شرحِ خطبۂ شقشقیہ“ مرکز افکار اسلامی کی جانب سے آپ کی خدمت میں پیش کی جا رہی ہے۔

شہیدؒ نے اپنی دیگر کتابوں میں جہاں جہاں نہج البلاغہ اور بالخصوص خطبۂ شقشقیہ کا حوالہ دیا ہے، ان تمام مقامات کو جمع کرنے کی بھی کوشش کی جائے گی۔

مقبول حسین علوی
مرکز افکار اسلامی
15 نومبر 2026ء


اسم کتاب: شرح خطبہ شقشقیہ نہج البلاغہ
شارح: شہید ثالث علامہ سید نور اللہ بن شریف‌ الدین شوشتری رحمۃ اللہ علیہ
زبان: فارسی
صفحات: 18
ذخیرہ: مرکز بین المللی مائیکرو فلم، نئی دہلی
موضوع: خلافت، حکومت علی، ریاست مدینہ، کلام امیرالمومنین امام علی علیہ السلام، نہج البلاغہ
سال اشاعت: لگ بھگ 990ھ، 1580ء

ڈاؤن لوڈ کریں

آن لائن پڑھیں

ڈاؤن لوڈ کریں

اس بارے میں مزید

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے

Back to top button