توضیحات تحقیقیہ فی شرح خطبہ شقشقیہ نہج البلاغہ

﷽

نہج البلاغہ کا جب نام آتا ہے تو خطبہ شقشقیہ ضرور ذہنوں میں گردش کرنے لگتا ہے۔ خطبہ شقشقیہ کو علم کلام کی بحث امامت میں خاص اہمیت حاصل ہے۔ اس خطبے کا ایک جملہ ”اَنَّ مَحَلِّیْ مِنهَا مَحَلُّ الْقُطْبِ مِنَ الرَّحَیٰ“، ”میرا خلافت میں وہی مقام ہے جو چکی کے اندر اس کی گیلی کا ہوتا ہے“، موضوع امامت کی بہت سی بحثوں کو اپنے اندر سمیٹے ہوئے ہے۔

بر صغیر کے علما نے امامت کے موضوع پر جو تحقیقات پیش کیں وہ اپنی مثال آپ ہیں۔ ان علمی سرمایوں میں سے ایک کتاب ”توضیحات تحقیقیہ فی شرح خطبہ شقشقیہ“ ہے۔ یہ کتاب بر صغیر میں علم کے درخشاں آفتاب سید دلدار علی قدس سرہ الشریف کے پوتے اور سلطان العلما السید محمد طاب ثراہ کے فرزند محقق علامہ السید علی اکبر نقوی متوفی 1309 ہجری کی محنت کا ثمر ہے۔

مرکز افکار اسلامی نے کتابت کے جدید وسائل کو استعمال کرتے ہوئے اس کتاب کو خوبصورت اور نئے انداز سے تدوین کیا اور قوم کی خدمت میں پہلی بار فخریہ طور پر پیش کرنے کا شرف حاصل کیا۔ 140 سال قبل تالیف کی گئی کتاب ملاحظہ فرمائیں۔

مقبول حسین علوی
مرکز افکارِ اسلامی پاکستان

توضیحات تحقیقیہ فی شرح خطبہ شقشقیہ

نام کتاب	توضیحات تحقیقیہ فی شرح خطبہ شقشقیہ نہج البلاغہ
تصنیف:	مولانا علی اکبر بن سید الانام سلطان العلما رضوان مآب جناب السید محمد طاب ثراہ
تاریخ اشاعت:	اکتوبر 2026ء، ربیع الثانی 1448ھ
طبع:	اوّل
ناشر:	مرکز افکار اسلامی، پاکستان
صفحات:	262
ملک:	پاکستان
زبان:	اردو
کتاب ملنے کا پتہ	جامعہ جعفریہ، جنڈ، ضلع اٹک
فون:	0335-1625579

آن لائن پڑھیں

ڈاؤن لوڈ کریں

مقدمہ

بِسْمِ اللهِ الرَّحْمٰنِ الرَّحِيمِ
اَلْحَمْدُ لِلَّهِ رَبِّ الْعَالَمِيْنِ وَالصَّلٰوةُ وَالسَّلَامُ عَلٰى سَيِّدِ الْأَنْبِيَاءِ وَالْمُرْسَلِيْنِ وَ عَلٰى الِهِ الطَّاهِرِيْنِ

نہج البلاغہ حضرت امیر المومنین علی علیہ السلام کی معرفت کا اہم ذریعہ ہے۔ نہج البلاغہ میں امام نے اپنے فضائل بیان فرمائے تو اپنی مظلومیت کے مرثیے بھی سنائے۔ اس کتاب کا تیسرا اور معرکتہ الآرا خطبہ سشقشقیہ کے نام سے مشہور ہے۔ خطبہ سشقشقیہ میں امام نے چند جملوں میں اپنے فضائل کو بیان فرمایا اور تفصیل سے اپنی مظلومیت کا تذکرہ کیا۔ پورے نہج البلاغہ میں امام نے اپنے کون سے فضائل و مصائب ذکر فرمائے اسے ہم نے اپنی کتاب ”نہج البلاغہ اور معرفت امام علی علیہ السلام“ میں تفصیل سے بیان کیا ہے۔ اس وقت آپ کے لیے برصغیر کے ایک عظیم علمی خاندان ”خاندان اجتہاد“ کے چشم و چراغ علامہ سید علی اکبر نقوی طاب ثراہ کے ایک علمی شاہکار کو پیش کیا جا رہا ہے۔ آپ برصغیر میں تشیع کی ترویج تبلیغ کے مجدد حضرت علامہ سید دلدار علی غفران مآب کے پوتے اور سلطان العلما سید محمد غفران مآب کے فرزند تھے۔ آپ نے امیر المومنین علیہ السلام کے خطبہ شقشقیہ کی مفصل شرح بنام ”التوضیحات الحقیقیہ فی شرح خطبہ الشقشقیہ“ تحریر فرمائی۔

خطبہ شقشقیہ امام کی زندگی کی ایک مختصر اور جامع تاریخ ہے۔ امام نے اپنے فضائل کے جو چند جملات ارشاد فرمائے وہ امام کے مقام عظمت کا بہترین نمونہ ہیں۔

کلی فضائل کے بیان کے لیے فرمایا:
يَنْحَدِرُ عَنِّي السَّيْلُ، وَلَا يَرْقٰی اِلَىَّ الطَّيْرُ
میں وہ کوہ بلند ہوں جس پر سے عظمتوں کے سیلاب کا پانی گزر کر نیچے گرتا ہے اور میری فضیلتوں کے ادراک تک کوئی پرندہ فکر پر نہیں مار سکتا۔

اس خطبہ میں چونکہ خلافت کا تذکرہ ہوا ہے تو خلافت کے لحاظ سے خصوصیت سے ایک جملہ میں اپنا مقام یوں پیش کیا:
اَنَّ مَحَلِّیْ مِنهَا مَحَلُّ الْقُطْبِ مِنَ الرَّحٰی۔
خلافت میں میرا مقام وہی ہے جو چکی کے اندر اس کی کیلی کا ہوتا ہے۔

اس خطبہ میں امامؑ نے اپنے حق کے چھن جانے کو تفصیل سے بیان کیا ہے اس لیے ایک طبقہ نے اس کے کلام امامؑ ہونے سے انکار کیا اور سید رضیؒ کا گھڑا ہوا خطبہ قرار دیا ہے اور بہت سوں نے اسی وجہ سے نہج البلاغہ کو ہی کلام امامؑ ماننے سے انکار کیا ہے۔ ان اعتراضات کا جواب آپ تفصیل سے اس کتاب میں پڑھیں گے۔ علما امامیہ اور علما اہل سنت میں سے ایک بڑی تعداد نے جو سید رضیؒ کی ولادت سے بھی پہلے وفات پاچکے تھے اپنی کتابوں میں اس خطبہ کو درج کیا ہے اور بعض نے اس کی شرح بھی لکھی ہے۔
سید عبد الزهراء الحسینی الخطیب نے اپنی شہرہ آفاق کتاب ”مصادر نہج البلاغہ و اسانیدہ“ میں اور آقای محمد دشتی نے کتاب ”معجم المفہرس لالفاظ نہج البلاغہ“ میں نہج البلاغہ کے خطبات و خطوط و کلمات قصار کے مصادر و اسناد کو پیش کیا۔ انہوں نے اس خطبہ کے مصادر کے طور پر جن قدیم کتابوں کے نام لکھے ہیں ان میں سے کچھ مشہور نام درج ذیل ہیں۔

المحاسن: ابوجعفر البرقی متوفی 274ھ
كتاب الانصاف فی الامامۃ: ابو جعفر ابن قبہ الرازی متوفی 319ھ
کتاب الغارات: ابو اسحاق ابراهیم الثقفی الکوفی متوفی 283ھ
الارشاد: الشیخ المفید علیہ الرحمۃ متوفی 413ھ
العقد الفريد: ابن عبد ربہ متوفی 328ھ
قوت القلوب: ابو طالب مکی متوفی 386ھ
نثر الدر وزیر ابو سعید الآبی متوفی 421ھ
الجمل: شیخ مفید علیہ الرحمۃ 413ھ
المغنی: قاضی عبد الجبار متوفی 415ھ
تحف العقول: الشیخ الحرانی متوفی 1381ھ
الامالی: شیخ الطوسی علیہ الرحمۃ
الشافی: الشريف المرتضیٰ برادر سید رضیؒ
الرسائل: الشريف المرتضی، رسائل کی جلد دوم میں سید مرتضیٰ نے اس خطبہ کی شرح لکھی ہے۔
نہج البلاغہ کے اہلسنت شارح ابن ابی الحدید معتزلی نے اس خطبہ کو امام کا خطبہ قرار دیتے ہوئے اس پر بہت سے دلائل پیش کیے ہیں۔

اردو زبان میں بھی متعدد علما نے نہج البلاغہ کی اہمیت و اسناد پر مستقل کتابیں اور مقالے لکھے ہیں۔ اسی کے ضمن میں خط شقشقیہ کے مصادر و اسانید کا تذکرہ کیا۔

(1) ان کتابوں میں سے اہل سنت کے کے ایک مشہور دانشور فاضل اہل سنت خان امتیاز علی خان عرشی رامپوری کی کتاب ”اسناد نہج البلاغہ“ کو خاص شہرت حاصل ہے۔ اس کتاب کا عربی اور فارسی میں ترجمہ بھی کیا گیا ہے۔

(2) برصغیر کی مایہ ناز شخصیت علامہ سیدعلی نقی نقنؒ نے بھی ”نہج البلاغہ کا اسناد“ نام سے ایک کتاب لکھی ہے جس میں انہوں نے خطبہ شقشقیہ کے کلام امامؑ ہونے پر مفصل گفتگو کی ہے۔ علامہ علی نقی نقویؒ نے علامہ مفتی جعفر حسینؒ کے نہج البلاغہ کے اردو ترجمہ کے مقدمہ میں اس کتاب کے کافی حصہ کو درج کیا ہے۔ نہج البلاغہ پر ہونے والے اعتراضات کے جوابات کے لیے نقن صاحب کا 40 صفحات کا یہ مقدمہ بہت مفید ہے۔

(3) اردو زبان کے شیعہ مصنفین و مؤلفین میں سے ایک قابل قدر نام آغا محمد سلطان مرزا کا ہے۔ انہوں نے اپنی کتاب ”البلاغ المبین“ کی دوسری جلد میں امامت کے موضوع کے ثبوت کے طور پر خطبہ شقشقیہ کو تفصیل سے بیان کیا ہے۔ مرزا صاحب نے نقن صاحب کی کتاب ”نہج البلاغہ کا اسناد“ کے کافی حصہ کو درج کیا ہے۔

(4) نہج البلاغہ پر ایک یاد گار کام انجام دینے والے عظیم محقق الفاضل الشہیر السید سبط الحسن الہنسویؒ ہیں۔ آپ نے لندن میں موجود عراق کے ایک سنی پروفیسر عبداللہ خلوصی کے نہج البلاغہ پر کیے جانے والے آٹھ اعتراضات کا بے مثال تحقیقی جواب پیش کیا ہے۔ آپ کی کتاب ”منہاج نہج البلاغہ“ واقعاً تحقیقی کتاب ہے۔ راجہ صاحب محمود آباد نے اس کتاب کو بہت سراہا تھا اور اس کا انگریزی ترجمہ کرانے کا بھی کہا تھا۔

(5) نہج البلاغہ کے اردو مترجمین میں سے اکثر نے خطبہ شقشقیہ پر مفصل بحث کی ہے۔ ان میں سے قابل ذکر سید علی اظہرؒ مترجم نہج البلاغہ اور مفتی جعفر حسینؒ کی تحریریں ہیں۔

خطبہ شقشقیہ کا موضوع خلافت ہے اس لیے امامت و خلافت کے موضوع پر لکھنے والے دانشوروں نے اس کے حوالے ضرور دیے ہیں۔ لکھنؤ کی علمی شخصیات میں سے جناب سید علی اکبر کی خطبہ شقشقیہ کی شرح آپ کے ہاتھ میں ہے۔ اس کے علاوہ ان کے برادر گرامی جناب سید علی محمد تاج العلماؒ نے بھی اس خطبہ کی شرح لکھی ہے۔ (مطلع انوار، سید مرتضی حسین صدر الافاضل صفحہ 368) برصغیر کے عظیم مجتہد علامہ مفتی محمد عباس شوشتریؒ نے بھی اس خطبہ کی شرح لکھی ہے جس کا تذ کرہ علامہ طہرانیؒ نے ”الذریعہ“ میں کیا ہے اور لکھا ہے کہ یہ کتاب لکھنؤ سے شایع ہوئی ہے۔ (شارحین نہج البلاغہ برصغیر، مولانا ڈاکٹر شہوار حسین نقوی صفحہ 78) سید علی اکبر کی شرح کے علاوہ شروح اس وقت تک ہمیں دستیاب نہ ہوسکیں۔ کاش یہ علمی سرمائے منظر عام پر لائے جا سکیں۔

خطہ شقشقیہ کے کلام امام ہونے کو رد کرتے ہوئے ایک دلیل یہ پیش کی جاتی ہے کہ امامؑ خلافت کے بارے میں ایسی گفتگو اور ایسے شکوے کیسے کر سکتے ہیں جبکہ امام کا خلفاء سے بہت اچھا تعلق تھا۔ اس لیے واضح ہو کہ خطبہ شقشقیہ کے علاوہ نہج البلاغہ کے متعدد مقامات پر اور دیگر منابع میں امامؑ کی مظلومیت اور شکووں کی ایک طویل فہرست ہے۔ امامؑ نے بار بار اپنی مظلومیت کو بیان کیا۔ صحیح بخاری میں بھی چند مقامات پر امامؑ کی اس مظلومیت کا ذکر ہے۔ سورہ حج کی آیت 19 کی تفسیر میں حدیث نمبر 4744 میں لکھتے ہیں علی علیہ السلام فرماتے ہیں:

اَنَا اَوَّلُ مَنْ يَجْثُوْبَيْنَ يَدَيِ الرَّحْمٰنِ لِلْخُصُوْمَةِ يَوْمَ الْقِيَامَةِ
میں پہلا شخص ہوں گا جو قیامت کے دن رحمٰن کے سامنے مقدمہ بازی (فیصلے) کے لیے گھٹنوں کے بل بیٹھوں گا۔

علامہ طبرسی نے کتاب الاحتجاج جلد اوّل میں ایسے متعدد تفصیلی فرامین کو نقل کیا ہے۔ ایک جگہ لکھتے ہیں۔

عَنْ جَعْفَرِ بْنِ مُحَمَّدٍ، عَنْ آبَائِهِ عَلَيْهِمُ السَّلَامُ قَالَ: خَطَبَ اَمِيرُ الْمُؤْمِنِينَ صَلَوَاتُ اللهِ عَلَيْهِ بِالْكُوفَةِ، فَلَمَّا كَانَ فِي آخِرِ كَلَامِهِ، قَالَ: اَلَا وَ إِنِّي لَاَوْ لَى النَّاسِ بِالنَّاسِ، وَمَا زِلْتُ مَظْلُومًا مُنْذُ قُبِضَ رَسُوْلُ اللهِ صَلَّى اللهُ عَلَيْهِ وَآلِهِ وَسَلَّمَ
امیر المومنین علیہ السلام نے کوفہ میں خطبہ دیا اور خطبہ کے آخر میں ارشاد فرمایا: تمہیں معلوم ہونا چاہیے کہ میں تمام لوگوں سے افضل و برتر ہوں مگر جب سے رسول اللہ ﷺ کا انتقال ہوا میں ہمیشہ سے مظلوم ہوں۔

ایسے درجنوں مقامات ہیں جہاں امامؑ نے اپنی مظلومیت کو بیان فرمایا اور رعایا کے شکوے کیے۔ ہم نے اپنی کتاب ”نہج البلاغہ اور معرفت امام علی علیہ السلام“ میں فقط نہج البلاغہ سے ایسے 21 مقامات ذکر کیے جہاں امامؑ نے اپنی مظلومیت کو بیان فرمایا اور 18 ایسے مقامات پیش کیسے جہاں امامؑ نے رعایا کے شکوے کیے۔

مثلاً ایک مقام پر آپؑ اپنی مظلومیت کو یوں بیان فرماتے ہیں:
فَوَاللهِ! مَا زِلْتُ مَدْفُوْعًا عَنْ حَقِّىْ، مُسْتَأْثَرًا عَلَىَّ، مُنْذُ قَبَضَ اللهُ تَعَالیٰ نَبِيَّةَ ﷺ حَتّٰى يَوْمِ النَّاسِ هَذَا۔
خدا کی قسم! جب سے اللہ نے اپنے رسولؐ کو دنیا سے اٹھایا، برابر دوسروں کو مجھ پر مقدم کیا گیا اور مجھے میرے حق سے محروم رکھا گیا۔⁽¹⁾

ایک مقام پر خطبہ شقشقیہ سے ملتے جلتے الفاظ میں اپنی مظلومیت اور حق چھننے اور تلوار نہ اٹھانے کو یوں بیان فرمایا:
فَنَظَرْتُ فَإِذَا لَيْسَ لِي مُعِيْنٌ إِلَّآ أَهْلُ بَيْتِي، فَضَنِنْتُ بِهِمْ عَنِ الْمَوْتِ، وَأَغْضَيْتُ عَلَى الْقَذٰى، وَ شَرِبْتُ عَلَى الشَّجَا، وَ صَبَرْتُ عَلٰٓى اخْذِ الْکَظَمِ ، وَ عَلٰٓى اَمَرَّ مِنْ طَعْمِ الْعَلْقَمِ۔
میں نے نگاہ اٹھا کر دیکھا تو مجھے اپنے اہل بیتؑ کے علاوہ کوئی اپنا معین و مددگار نظر نہ آیا۔ میں نے انہیں موت کے منہ میں دینے سے بخل کیا۔ آنکھوں میں خس و خاشاک تھا مگر میں نے چشم پوشی کی، حلق میں پھندے تھے مگر میں نے غم و غصہ کے گھونٹ پی لئے اور گلو گرفتگی کے باوجود حنظل سے زیادہ تلخ حالات پر صبر کیا۔ ⁽²⁾

امیرالمومنین علیہ السلام کو حاکم شام نے ابو امامہ الباہلی نامی شخص کے ذریعہ ایک خط لکھا جس میں سابقہ خلفا کے فضائل اور خلیفہ سوم کی مظلومیت کا ذکر کیا اور امامؑ پر اعتراضات کیے اور آپ کے لیے حاسد جیسے نازیبا الفاظ استعمال کیے۔ اس خط کے جواب میں امامؑ نے جو خط تحریر فرمایا، سید رضیؒ نے اسے امیر المومنین علیہ السلام کے بہترین مکتوبات میں سے شمار کیا ہے۔

آپ اس خط میں لکھتے ہیں۔
وَ قُلْتَ: اِنِّیْ كُنْتُ اُقَادُ كَمَا یُقَادُ الْجَمَلُ الْمَخْشُوْشُ حَتّٰۤی اُبَایِـعَ، وَ لَعَمْرُ اللهِ! لَقَدْ اَرَدْتَّ اَنْ تَذُمَّ فَمَدَحْتَ، وَ اَنْ تَفْضَحَ فَافْتَضَحْتَ! وَ مَا عَلَی الْمُسْلِمِ مِنْ غَضَاضَةٍ فِیْۤ اَنْ یَّكُوْنَ مَظْلُوْمًا مَّا لَمْ یَكُنْ شَاكًّا فِیْ دِیْنِهٖ، وَ لَا مُرْتَابًۢا بِیَقِیْنِهٖ! وَ هٰذِهٖ حُجَّتِیْۤ اِلٰی غَیْرِكَ قَصْدُهَا، وَ لٰكِنِّیْۤ اَطْلَقْتُ لَكَ مِنْهَا بِقَدْرِ مَا سَنَحَ مِنْ ذِكْرِهَا.
اور تم نے لکھا ہے کہ مجھے بیعت کیلئے یوں کھینچ کر لایا جاتا تھا جس طرح نکیل پڑے اونٹ کو کھینچا جاتا ہے، تو خالق کی ہستی کی قسم! تم اترے تو برائی کرنے پر تھے کہ تعریف کرنے لگے، چاہا تو یہ تھا کہ مجھے رسوا کرو کہ خود ہی رسوا ہو گئے۔ بھلا مسلمان آدمی کیلئے اس میں کون سی عیب کی بات ہے کہ وہ مظلوم ہو، جبکہ وہ نہ اپنے دین میں شک کرتا ہو، نہ اس کا یقین ڈانواں ڈول ہو۔ اور میری اس دلیل کا تعلق اگرچہ دوسروں سے ہے مگر جتنا بیان یہاں مناسب تھا تم سے کر دیا۔ ⁽³⁾

امام علیہ السلام کی مظلومیت کا یہ باب بہت طویل ہے۔ نہج البلاغہ کے اِس دور کے ایک شارح علامہ محمد تقی جعفری قدس سرہ شرح نہج البلاغہ میں ایک مقام پر لکھتے ہیں: نہج البلاغہ امامؑ کے گریہ و نالہ سے بھرا پڑا ہے۔ امامؑ کی مظلومیت کے امامؑ کی اپنی زبانی بیان کیے گئے ایک مرثیہ کے دو اشعار پر یہ حصہ ختم کرتے ہیں۔

میری جان میری آہوں اور سسکیوں کے ساتھ سینے میں قید ہو کر رہ گئی ہے، کاش یہ جان انہی آہوں کے ساتھ باہر نکل جاتی۔ آپ (صدیقہ طاہرہ) کے بعد اب اس زندگی میں کوئی خیر باقی نہیں رہی ، میں تو بس اس بات کے خوف سے رو رہا ہوں کہ کہیں میری زندگی طویل نہ ہو جائے (اور مجھے آپ کے بغیر مزید جینا نہ پڑے)۔ ⁽⁴⁾

غیروں سے ملنے والے دکھوں کو جن درد بھرے لفظوں میں آپؑ نے بیان فرمایا اسے ہم نے مظلومیت کا عنوان دیا اور اپنوں سے اور ساتھ کھڑے ہونے والوں سے جن مصیبتوں کو دیکھنا پڑا انہیں ہم نے شکووں کا نام دیا۔ نہج البلاغہ میں جن 18 مقامات میں رعایا سے گلے شکوے کیے ان میں سے فقط ایک کو نقل کرتے ہیں۔

آپؑ نے ارشاد فرمایا:
فَاِذَاۤ اَمَرْتُكُمْ بِالسَّیْرِ اِلَیْهِم فِیْۤ اَیَّامِ الْحَرِّ قُلْتُمْ: هٰذِهَٖ حَمَارَّةُ الْقَیْظِ اَمْهِلْنَا یُسَبَّخْ عَنَّا الْحَرُّ، وَ اِذَاۤ اَمَرْتُكُمْ بِالسَّیْرِ اِلَیْهِمْ فِی الشِّتَآءِ قُلْتُمْ: هٰذِهِ صَبَارَّةُ الْقُرِّ اَمْهِلْنَا یَنْسَلِخْ عَنَّا الْبَرْدُ، كُلُّ هٰذَا فِرَارًا مِّنَ الْحَرِّ وَ القُرِّ، فَاِذَا كُنْتُمْ مِنَ الْحَرِّ وَ الْقُرِّ تَفِرُّوْنَ فَاَنْتُمْ وَاللهِ! مِنَ السَّیْفِ اَفَرُّ!
اگر گرمیوں میں تمہیں ان کی طرف بڑھنے کیلئے کہتا ہوں تو تم یہ کہتے ہو کہ یہ انتہائی شدت کی گرمی کا زمانہ ہے، اتنی مہلت دیجئے کہ گرمی کا زور ٹوٹ جائے۔ اور اگر سردیوں میں چلنے کیلئے کہتا ہوں تو تم یہ کہتے ہو کہ کڑا کے کا جاڑا پڑ رہا ہے، اتنا ٹھہر جائیے کہ سردی کا موسم گزر جائے۔ یہ سب سردی اور گرمی سے بچنے کیلئے باتیں ہیں۔ جب تم سردی اور گرمی سے اس طرح بھاگتے ہو تو پھر خدا کی قسم! تم تلواروں کو دیکھ کر اس سے کہیں زیادہ بھاگو گے۔ ⁽⁵⁾

مؤلف کتاب علامہ سید علی اکبر نقویؒ کا تعارف

برصغیر میں شیعیت کب سے ہے اور کیسے پھیلی یہ ایک طویل اور الگ موضوع ہے اور اس پر بہت کچھ لکھا جا چکا ہے۔ موجودہ دور میں تشیع کی ترویج کا ایک اہم سبب اتر پردیش کے علاقے اودھ (لکھنؤ) اور بنگال میں آزاد شیعہ نوابوں کی حکومتیں بنیں۔ اس دور میں لکھنؤ بر صغیر میں شیعہ تہذیب، علم، عزاداری اور قلمی سرگرمیوں کا سب سے بڑا مرکز بن گیا۔ لکھنؤ کی اس مرکزیت میں ایک اہم کردار آیت اللہ سید دلدار علی غفران مآبؒ کا ہے۔ آپ نصیر آباد میں 1753ء، 1166ھ میں پیدا ہوئے اور 1196ھ میں لکھنؤ میں آئے۔ آپ پہلے نامور عالم میں جو بر صغیر سے تحصیل علم کے لیے عراق گئے۔ وہاں اپنا علمی مقام منوایا اور ایک شب قدر کی مبارک ساعت میں زیر قبہ حضرت امیر المومنین علی علیہ السلام دعا فرماتے ہیں کہ اللہ ان کی اولاد در اولاد کو علم دین سے وابستہ رکھے اور علما اور مجتہدین پیدا ہوتے رہیں۔ ان کی دعا قبول ہوئی اور کم و بیش دو سو برس سے یہ سلسلہ جاری ہے۔ ⁽⁶⁾

آپ کو اللہ سبحانہ نے پانچ نرینہ اولاد میں عطا فرمائیں جو سب علمائے دین بنے۔ آپ کے فرزندان میں سے سلطان العلما سید محمد رضوان مآب متوفی 1284ھ اور سید العلما سید حسین متوفی 1273ھ کو خاص مقام حاصل ہوا۔ سید محمد سلطان العلما 17 صفر 1199ھ میں پیدا ہوئے۔ انیس سال کی عمر میں والد سے مفصل اجازہ عطا ہوا۔ آپ کی دینی و قومی خدمات اور علمی کارناموں کی ایک طویل فہرست ہے۔ پچاسی سال کی عمر میں دنیا سے رخصت ہوئے۔ آپ کی نو نرینہ اولادیں تھیں۔ ان میں سے ایک علامہ سید علی اکبرؒ تھے۔

سید علی اکبر نقویؒ 1832ء مطابق 1249ھ کو پیدا ہوئے۔ آپ کو سلطان العلما جیسے عظیم باپ کی شاگردی کے ساتھ ساتھ برصغیر کے آسمان علم کے چمکتے ستارے علامہ مفتی محمد عباس شوشتری متوفی 1306ھ جیسے استاد سے بھی حصول علم کا موقع ملا۔ علامہ مفتی محمد عباس کو نہج البلانغہ سے خاص عشق تھا۔ ان کی کتابوں میں بار بار نہج البلاغہ کے حوالے ملیں گے۔ آپ نے خود بھی نہج البلاغہ کے خطبہ شقشقیہ کی فارسی میں شرح تحریر فرمائی جو 1287ھ میں لکھنؤ سے شائع ہوئی اور شاگردوں کو بھی نہج البلاغہ کی طرف راغب کیا۔ شاید مفتی صاحب کی ترغیب سے ہی جناب سید علی اکبر نے بھی یہ شرح لکھی۔ یہ شرح 1307ھ کو مکمل ہوئی۔

سید علی اکبر نے ”اسرار حکمت“ نام سے نہج البلاغہ کے خطبہ نملیہ اور خطبہ طاووسیہ کا بھی ترجمہ کیا۔ جیسا کہ پہلے رقم ہو چکا ہے سیدعلی اکبرؒ کے دوسرے بھائی تاج العلما سید علی محمد متولد 1845ء متوفی 1894ء نے بھی خطبہ شقشقیہ کی شرح لکھی۔ مفتی صاحب نے اپنے ایک اور شاگرد احمد حسین امروہوی متوفی 1328ھ کو شرح نہج البلاغہ ابن ابی الحدید کی تلخیص کی طرف راغب کیا جو کام انہوں نے مکمل کیا۔ محسوس ہوتا ہے کہ مفتی صاحب کو نہج البلاغہ سے ایک خاص لگاؤ تھا جس کی بنا پر انہوں نے خود بھی اور ان کے شاگردوں نے بھی نہج البلاغہ پر کام کیا۔ سید علی اکبر نے 1327ھ 1909ء کو اس جہاں سے کوچ فرمایا۔ یہ شرح ماہ ربیع الثانی 1322ھ 1906ء کولکھنؤ سے شائع ہوئی۔

ایک تصور قائم ہے کہ بر صغیر میں نہج البلاغہ پر کام مصر میں مفتی محمد عبدہ کے نہج البلاغہ پر حاشیہ لکھنے کے بعد شروع ہوا ہے مگر مفتی محمد عباس صاحب کی شرح اور دیگر کاموں کو دیکھنے کے بعد یہ تصور غلط ثابت ہوتا ہے کیونکہ مفت محمد عبدہ کا حاشیہ پہلی بار 1304ھ مطابق 1885ء میں شائع ہوا اور مفتی محمد عباس کی رحلت 1306ھ میں ہوئی۔ درمیان میں اتنا وقفہ نہیں کہ شیخ محمد عبدہ سے متاثر ہو کر اتنے مختصر وقت میں اتنا کام کیا جائے۔

مرکز افکار اسلامی کا ایڈیشن

مرکز افکار اسلامی پچیس سال سے کوشاں ہے کہ نہج البلاغہ کے پیغام کو عام کرے۔ اس مقصد کے لیے کہیں نہج البلاغہ دروس کا اہتمام کیا جاتا ہے تو کہیں نہج البلاغہ کانفرسوں کا انعقاد، کبھی مطالعاتی انعامی مقابلوں کو ذریعہ بنایا جاتا ہے تو کبھی حفظ نہج البلاغہ کے مقابلے کرائے جاتے ہیں۔ کبھی مقالہ نویسی کے مقابلے کرائے جاتے میں تو کہیں نہج البلاغہ کے تراجم کی اشاعت۔ ان سالوں میں نہج البلاغہ سے متعلق چالیس سے زیادہ کتب کی اشاعت ہو چکی ہے۔

افکار اسلامی کے اہم اہداف میں سے ایک یہ ہے کہ نہج البلاغہ پر ہونے والے بزرگ علما کے کاموں کو قوم تک پہنچایا جائے۔ اس مقصد کے لیے علامہ مفتی جعفر حسینؒ کے ترجمہ و حواشی کو نئے انداز سے شائع کرایا گیا، فقط اردو ترجمہ کی الگ اشاعت کرائی گئی، بغیر حواشی کے عربی و اردو کو الگ شائع کیا گیا اور انگریزی ترجمہ کی اشاعت ہوئی۔ نہج البلاغہ موبائیل ایپ پیش کی گئی اور نہج البلاغہ عربی متن اردو ترجمہ اور حواشی کے ساتھ ویب سائٹ پر شائع کیا گیا۔

جدید دور کے تبلیغی وسائل کو استعمال کیا جا رہا ہے اور اردو ویب سائٹ، انگریزی ویب سائٹ اور یو ٹیوب چینل بنائے گئے۔ افکار اسلامی کی شائع شدہ کتب افکار کی ویب سائٹ پر ملاحظہ کی جاسکتی ہیں۔ افکار اسلامی نہج البلاغہ سے متعلق قدیمی کتابوں کو از سر نو اشاعت کی سعی کر رہا ہے۔ ان کتابوں میں سے ایک کتاب ”التوضیحات الحقیقیہ فی شرح الخطبْْْْْْْْْْْْْْْْْْْْہ الشقشقیہ“ اب آپ کے ہاتھ میں ہے۔ یہ کتاب آج سے 140 سال پہلے لکھی گئی اور ایک ہی دفعہ شائع ہو سکی اور وہ اشاعت بھی اب ڈھونڈتے نہیں ملتی۔ طویل مدت اس کتاب کو تلاش کرنے میں لگی ، وہ بھی اصل کتاب نہ مل سکی بلکہ اس کا عکسی نسخہ ملا۔ قدیم اشاعت، پرانی اردو، عربی و فارسی کا بہت استعمال اور عکس بھی بعض مقامات پر مدھم اور کہیں کہیں الفاظ بالکل مدھم اور غیر واضح بلکہ کچھ مقامات ہر عکس میں کئے ہوئے ملے ۔ اس سب کے باوجود کتاب کو قابل مطالعہ بنانے کے لیے کتنے جتن کیے گئے اسے کوئی کتاب شناس ہی جان سکتا ہے۔

الف۔ کتاب کی اصل الفاظ و جملات کو باقی رکھا گیا کوئی تبدیلی نہیں کی گئی۔
ب۔ جو چند لفظ غیر واضح تھے ان کی جگہ خالی چھوڑ دی گئی۔
ج – عربی اور اردو کے عام رائج رسم الخط کو استعمال کیا گیا۔
د۔ خطبہ کے جملات کو فقروں کے عنوان سے تقسیم کیا گیا تھا اس لیے ہر فقرہ کو ایک عنوان کے طور پر لایا گیا۔
ہ۔ بعض کتابوں یا افراد کے نام واضح نہیں تھے ان کو واضح طور پر لکھنے کی کوشش کی گئی۔

یوں ایک مدت کی محنت کے بعد اپنا ایک قدیم سرمایہ آپ کے ہاتھ میں ہے ۔ ہم ان تمام احباب کے شکر گزار ہیں جنہوں نے کتاب کی تلاش سے لے کر اشاعت تک تعاون فرمایا۔ پروردگار سب کی اس کوشش کو قبول فرمائے۔ اگر آپ نہج البلاغہ سے متعلق کسی قدیمی کتاب سے آگاہ ہوں تو افکار اسلامی کو مطلع فرمائیں تاکہ اسے بھی منظر عام پر لانے کا اہتمام کیا جاسکے۔

وما توفيقنا الابالله
مقبول حسین علوی
مرکز افکار اسلامی پاکستان
19 اکتوبر 2026، ماه ربیع الثانی 1438ھ

حوالہ جات

[1] نہج البلاغہ، خطبہ 6
[2] نہج البلاغہ، خطبہ 26
[3] نہج البلاغہ مکتوب 28
[4] کمال الدین میبدی، شرح دیوان امیر المومنین علی علیہ السلام ، ص 123
[5] نہج البلاغہ خطبہ 27
[6] مطلع الانوار سید مرتضی حسین فاضل، ص 225

مزید مطبوعات