منظوم نہج البلاغہ خطبہ 52

یہ دنیا جارہی ہے کر چکی اعلان رخصت بھی

اور اس کی ہوگئیں معروف چیزیں مضمر و مخفی

یہ ہمسایوں کو لیکر جارہی ہے موت کی جانب

(اماں پائے بھلا کیونکر یہاں اس کا کوئی طالب)

بس اتنا رہ گیا ہے جتنا پانی تہ میں ہوتا ہے

جسے مقدار میں اک گھونٹ یا کہئے کہ جرعہ ہے

خدا کے بندو اس سے کوچ کی تیاریاں کر لو

زوال اس کا مقدر ہے ذرا آگاہ ہو جاؤ

قسم رب کی تم ان ناقوں کی صورت بھی کرو فریاد

جو بچے کھو چکی ہیں ہو چکی ہے جن کی گم اولاد

گھروں کو چھوڑ کر جو بس چکے ہوں کنج خلوت میں

جو ہر اک شئی سے کٹ کر ہوچکے ہوں گم عبادت میں

کراما کاتبیں نے لکھ دیا ہے جن کو دفتر میں

فرشتوں نے جنہیں محفوظ کر ڈالا ہے محضر میں

تو یہ اس اک جزاء سے کم ہے اس اک اجر سے کم ہے

تمہارے واسطے جس کی مجھے امید پیہم ہے

قسم رب کی تمہارے دل اگر بالکل پگھل جائیں

اور آنکھوں سے تمہاری خون کے قطرے بھی ڈھل جائیں

جو نعمت دی گئی ہے اس کا ‘ ایماں کی ہدایت کا

چکا سکتے ہیں قرضہ اور نہ ہی ہو سکتے ہیں بدلہ