نہج البلاغہ اور عرب شعراء

نہج البلاغہ کو سید رضیؒ نے سن 400 ھ میں جمع و مدوّن کیا۔ اس عظیم الشان کتاب کے بارے میں سب سے پہلی نظم یعقوب بن احمد (متوفیٰ 474 ھ) نے کہی، جس کے بعد ان کے فرزند حسن بن یعقوب اور شاگرد علی بن احمد نے بھی منظوم کلام پیش کیا۔ یہ ابتدائی تینوں شعری تاثر نہج البلاغہ کے قدیم نسخوں میں شائع ہوتے رہے ہیں۔ ان کا تذکرہ محققِ نہج البلاغہ، سید عبدالعزیز طباطبائیؒ نے اپنی ایک محققانہ تحریر میں نہایت وضاحت کے ساتھ کیا ہے۔

علامہ آقا بزرگ تہرانیؒ نے اپنی شہرۂ آفاق تصنیف الذریعہ کی جلد چہارم میں نہج البلاغہ کے تراجم و شروح کا ذکر کرتے ہوئے بعض شعری نمونے بھی درج کیے ہیں۔ اسی طرح علامہ تقی شوشتریؒ نے اپنی عظیم شرح نہج البلاغہ (چودہ جلدوں پر مشتمل) کی پہلی جلد میں چھبیس ایسے عرب شعراء کا کلام جمع کیا ہے جنہوں نے اس کتاب کے اثر و عظمت کو منظوم صورت میں بیان کیا۔

مدت سے یہ خواہش دل میں تھی کہ ان عربی اشعار کا اردو قالب بھی سامنے آئے تاکہ ہمارے اہلِ ذوق اور نوجوان اہلِ قلم ان تاثرات سے براہِ راست بہرہ مند ہو سکیں اور یہ جان سکیں کہ عرب شعراء نے نہج البلاغہ کے بحرِ معانی سے کس طرح استفادہ کیا۔ خوش قسمتی سے جناب مولانا نور ہاشم صاحب نے بڑی محبت اور محنت سے ان کا اردو ترجمہ انجام دیا۔ جو قارئین کی خدمت میں پیش کیا جا رہا ہے۔

امید ہے اردو قارئین کو اس علمی و ادبی سرمایہ کا کچھ اندازہ ہو سکے گا اور اس سے مستفید ہوں گے۔مرکز افکار اسلامی کی کوشش ہے کہ شعراء کرام اپنا حصہ بٹاتے رہیں اور کلام امام کے مفاہیم کو اپنے اپنے انداز میں اور اپنی اپنی پسندیدہ ہیئت میں پیش کریں۔

ان شاء اللہ جلد کچھ فارسی کلام بھی آپ کی خدمت میں پیش کیا جائے گا۔
مرکز افکار اسلامی

1: سید علی بن محمد آل زبارہ بیہقی، تاریخ وفات: 548ھجری

اے وہ (شخصیت) جس نے جوزاء (ستاروں کے جھرمٹ) کی بلندی کو بھی پیچھے چھوڑ دیا، میری جان قربان! دشمنوں کو نیست و نابود کرنے والا، دلیر اور شجاع۔

فاطمہ بتولؑ کے شوہر، رسولؐ کے بھائی، جو کافروں سے برسرِ پیکار رہے،کفار کے سر کچلنے والے اور دشمنوں کی یلغار کو توڑ دینے والے۔

تقویٰ کی رسّیوں کو مضبوطی سے تھامنے والے، جن کا دایاں ہاتھ سب کو معروف ہے، کہ کبھی قہر و ہلاکت برپا کرتا ہے اور کبھی بخشش و عطا۔

جن کا چہرہ ماہتاب کی مانند روشن ہے اور عزم حسینؑ جیسا بلند، اور مزاج حسنؑ کی طرح نرم و سکون بخش، اور طبیعت حسینؑ کی طرح عالی و معتدل۔

انہوں نے دنیا کو طلاق دی، لیکن کراہت کے ساتھ نہیں (بلکہ خوشی و رضا کے ساتھ)، اور نہ ہی سونے اور چاندی (دولت) نے انہیں دھوکے میں ڈالا۔

اگر وہ انسانی صورت میں نہ ہوتے، تو انہیں کبھی بنی نوعِ حوّا میں شمار نہ کیا جاتا۔

نہج البلاغہ ان کے اقوال میں سے ہے، جس کے سامنے بڑے بڑے بلیغ و فصیح لوگوں کی عقلیں حیران و گمراہ ہو جاتی ہیں۔

اس میں کتنے ہی خطبات ہیں جن کی نصیحتیں یوں مہکتی ہیں، جیسے بارش کے بعد کا باغ خوشبو سے لبریز ہو جائے۔

2: أبو نصر علی بن أبی سعد محمد بن الحسن بن أبی سعد الطبیب

نہج البلاغہ فصحاء کا چشمہ ہے، اور بلغا و علما کا آشیانہ ہے۔

یہ پرہیزگاروں کی فضیلتوں کے ہار ہیں، جو بغیر کسی استثنا کے یکساں طور پر اس کتاب میں رکھ دیے گئے ہیں،

اس کے اندر سب علوم چھپے ہوئے ہیں، گویا وہی "جفر” ہے جس کی خبر دی گئی ہے۔

جو اس کے راستے پر محنت و عزم سے چلے، وہ لغزشوں سے محفوظ رہا اور بلندیوں کو پا گیا۔

اس میں الٰہی علم کے تابندہ موتی نمایاں ہیں، جو گوہر آویزاں کی مانند ذہانت کی روشنی بکھیرتے ہیں۔

اس سے نبوی خوشبو مہکتی ہے، یہ تعجب کی بات نہیں، یہ تو بس نور کی سطح سے ایک معمولی جھلک ہے۔

یہ نازک اور لطیف حکمتوں کا باغ ہے، یہ فیض و عطا آسمانی روشنیوں کی کرنوں سے ہے، نہ کہ توہماتِ نجومی کی نسبت سے ۔

یہ انوار، اللہ کے خلیفہ کے علم کے ہیں، جو زندوں اور مردوں کی پناہ ہیں۔

انوارِ علم کے بڑے ستون اور چھوٹی شاخیں (سب کی سب) ہیبت زدہ اور نہایت آزمودہ ہیں، اور یہ بات کسی اختلاف کے بغیر ہے۔

یہ اللہ کے نور کا چراغدان ہے، اس کے علم کا خازن ہے، اور بطحا کی پاکیزہ نسل میں سے برگزیدہ ہے۔

وہ اپنی اصل و جڑ کا بیٹا ہے، اس درختِ عظمت کی شاخیں، جو امراء و سردار تھے، جھک پڑیں۔

وہ بہترین نبی کا وصی ہے، جسے اللہ نے چنا، چاہے قبیلہ تیم کے سب سے پست دشمنوں کو یہ کتنا ہی ناگوار کیوں نہ گزرا ہو۔

اللہ کی درود و رحمت ہو ان دونوں (نبی و وصی) پر، جب تک کہ اندھیروں کو روشنی کی کرنیں چاک کرتی رہیں۔

اور درود ہو ان کے برگزیدہ نواسے محمد (امام محمد بن علی الباقرؑ یا امام محمد الجوادؑ)، جو فصحا میں سبقت کے محور اور پیشوا ہیں۔

3 : شاعر کا نام معلوم نھیں ہے

نہج البلاغہ فصاحت و بلاغت والوں کا راستہ ہے۔ اور عاجز و تھکے ماندے کے لیے پناہ گاہ ہے۔

اس میں ایسے معانی ہیں جو مضبوط قالب میں ڈھالے گئے ہیں۔ ہدایت ایسے ہے جیسے اندھیروں میں ستارہ۔

اس کے مختصر کلمات اپنے اندر بلند و عالی معانی کے جامع نکات کو سموئے ہوئے ہیں ۔

اللہ کی رحمت و درود ہو نبی محمد پر۔ اور علی پر جو عظمت اور بھائی چارے کے مالک ہیں۔

اور یہ نہج البلاغہ تمام کتابوں کا سردار ہے۔ یہ خطبات، احکام اور رسائل میں سب سے اعلیٰ اور سب سے زینت بخش ہے ۔

اس میں کتنی ہی درخشاں اور گہری حکمتیں ہیں۔ اور کتنے ہی الٰہی علوم اور اعلیٰ مقاصد ہیں۔

یہ بیماری والے کے لیے دوا اور شفا ہے۔ اور آزمائش والے کے لیے راحت اور تھکے ھوئےکے لیے سکون ہے۔

اس میں اللہ کے ولی حیدر کا کلام ہے۔جن کے دائیں ہاتھ سے عطا کیا گیا مال قبول کیا گیا ہے۔

وہ، تمام بندگانِ خدا کے سردار (رسول ﷺ) کے وصی ہیں؛ جو اللہ کی طرف سے منتخب کیے گئے ہیں؛اور تمام عرب کے سید و سردار ہیں ۔

علی مرتضیٰ، جن کی محبت قیامت اور خوف کے دن نجات کی امید ہے۔

پس جو دل کی سچائی سے ان کی ولایت کو اپنائے۔وہ جنت میں سات بلند آسمانی ستاروں سے بھی اوپر خیمہ زن ہوگا۔

اور جو اس سے دشمنی کرے وہ جہنم کی آگ میں گرا۔ اور جتنی دیر زندہ رہا، مصیبت اور جنگ میں جیا۔

اس کی محبت میرے دل میں یوں گھل مل گئی ہےکہ وہ میری جان میں ایسے رواں ہے جیسے گوشت اور رگوں میں خون۔

اللہ، جو ہمارا اور تمام مخلوقات کا خالق اور تمام جہانوں کا رب ہے، اس پر درود بھیجے۔ اور اس کی پاکیزہ اولاد پر بھی رحمتیں نازل کرے۔

اور اللہ اسے جنتِ جاوید میں بلند مقام عطا کرے۔ اور اس کا درجہ تمام درجوں پر برتر اور بلند رکھے

4: شاعر کا نام معلوم نھیں ہے

نہج البلاغہ فضیلت اور ادب کا راستہ ہے۔ اور وہ ہر اس ہدایت کا راستہ ہے جسے صاحبِ ادب طلب کرتاھے۔

اس میں ایسے کلمات ہیں جن کے اندر حکمتیں پوشیدہ ہیں۔جو دلوں کو بیماریوں اور شکوک سے شفا بخشتے ہیں

یہ مہذب اور نایاب الفاظ کو سمیٹے ہوئے ہےجنہوں نے عجم اور عرب کے فصحاء کو لاجواب کر دیا۔

اگر تم اسے لوگوں کی باتوں سے پرکھوتو میں نے ایک دن اس بلند و پُرعظمت درخت کو مغرب کی سمت میں ناپ کر اس کی وسعت اور بلندی کا اندازہ لگایا۔

جو کوئی اس سے فوائد اخذ کرےوہ بلند درجوں پر پہنچ جاتا ہے، اور کیا ہی عظیم درجے ہیں۔

5: سید ضیاء الدین ابو الرضا فضل اللہ راوندی، تاریخ وفات: 571ھجری

نہج البلاغہ کا نور اہلِ بلاغت کے لیے بالکل روشن ہے۔

اس کا کلام فصاحت والوں کے کلام پر غالب اور غالباً رسوا کرنے والا ہے۔

اس میں علم کا سمندر موجزن ہے اور فضیلت اس میں نمایاں اور برتر ہے۔

توحید کے مشکل نکات سب اس میں کھل کر سامنے آتے ہیں

اس کی وعید اور وعدہ دونوں تمام انسانوں کے لیے مخلصانہ نصیحت ہیں۔

اس سے پوری دنیا فائدہ اٹھاتی ہے، چاہے نیک ہو یا بد۔

یہ (کتاب) قبیلوں کے مال و دولت کی طرح نہیں ہے جو آتا اور جاتا رہتا ہے۔

ہائے افسوس! اس کی بلند چوٹی تک کوئی مدّاح نہیں پہنچ سکتا۔

بیشک رضی موسوی (شریف رضی) ہی ہے جو اس کے چشمے سے سیراب ہوا ہے۔

اس کی مدح و تعریف کے اشعار ایسے ہیں جیسے بارش کے قطروں کی بے شمار تعداد

6: شاعر کا نام معلوم نھیں ہے

وہ کتاب جس کے صفحات حسن و لطافت کی آیات سے آراستہ ہیں، اور جس کا ہر جملہ بلاغت و فصاحت کے سانچے میں ڈھلا ہوا ہے۔

7: ادیب عبدالرحمٰن بن الحسین

نہج البلاغہ بہترین ذخیرہ اور مضبوط سہارا ہے، اس میں مؤمنین کے لیے بھلائی اور ہدایت ہے۔

یہ حیات کا چشمہ ہے اس کے لیے جو غور و فکر کرے، کتنا عظیم اور مبارک ہے وہ گروہ جو اس کے چشمۂ فیض سے سیراب ہوا ۔

نہ کسی آنکھ نے اس جیسا دیکھا، نہ کسی کان نے اس جیسا سنا، اور نہ ہی دنیا کے لکھنے والوں نے ایسا کچھ لکھا۔

جب میں نے اس کو لکھا تو میری روح نے گویا سیرابی پائی،اور روح کے لیے اس کے آثار سے مدد اور قوت حاصل ہوئی۔

اللہ کی رحمت ہو اس پر کہ جس کی گفتار ایسی روح تھی، کہ جس سے روح و جسم دونوں میں زندگی بڑھتی ہے۔

8: یعقوب بن احمدِ نیشاپوری ، تاریخ وفات:474ھجری

نہج البلاغہ ایک ایسا واضح اور کھلا راستہ ہے جو ہمیشہ تازہ رہتا ہے۔جو کوئی بلندی اور رفعت چاہے، اس کے لئے یہ ایک ایسی بلندی ہے جس کی کوئی انتہا نہیں۔”

اے وہ شخص جو خواہشِ نفس کے ذریعے ہدایت ڈھونڈ رہا ہے!اس (نہج البلاغہ) کی طرف آجاؤ، کیونکہ اسی میں بھلائی اور ہدایت ہے۔

خدا کی قسم! خدا کی قسم! جو لوگ اسے (نہج البلاغہ کو) چھوڑتے ہیں وہ اندھیروں میں بھٹک جاتے ہیں۔ شفا دینے والی نصیحتوں سے ، جو ساری کی ساری درستگی پر ہیں ۔

گویا یہ (نہج البلاغہ) ایک ہار ہے جس میں قیمتی جواہرات پروئے گئے ہوں ٰ، ہمارا ربّ صمد اس کے ناظم (امام علی علیه السلام) پر رحمت و درود نازل کرے۔

اگر تم انصاف کرو تو اس (نہج البلاغہ) تک پہنچنے میں لوگوں کے لیے کوئی رکاوٹ نہیں سوائے ضدی، سرکش، ظلم کرنے والوں اور حسد کرنے والوں کے.

9: علی بن احمد الفنجکردی نیشاپوری (معروف بہ ابوالحسن علی بن احمد پانچگردی) تاریخ وفات: 513 ھجری

نہج البلاغہ، حضرت مرتضیٰؑ (علیؑ) کے کلام سے ہے، جسے سید رضی موسوی نے جمع کیا۔

اس کی حسن و جمال نے عقلوں کو حیران کر دیا، گویا موتیوں کی لڑی ہے جو زمرد سے پروئی گئی ہو۔

اس کے الفاظ علوی ہیں، مگر حقیقت میں علوی ایسے کہ آسمان کے درخشاں ستارے کی جگہ پر جلوہ گر ہوئے۔

اس میں اہلِ بلاغت کے لیے کافی سرمایہ ہے، جو اسے حفظ کرے، وہ سعادت پاتا ہے

جب وہ قرآن پڑھتا ہے تو ساری آنکھیں اسی پر جم جاتی ہیں، اور اس کی زبان سے گویا ایک عظیم کتاب روشن محفل میں جلوہ گر ہوتی ہے۔

اس کے الفاظ باعثِ تعجب ہیں کہ یہ ایسے ہم آہنگ ہیں، جیسے تمام انسانوں کے سب سے بہتر، احمدؐ کے کلمات۔

یہ نوجوان کے لیے خطابت میں بہترین مددگار ہے، اور اسی سے فصاحت کی راہیں کھلتی ہیں۔

میں دیکھتا ہوں کہ یعقوب بن احمد نے اس کا ذکر کیا، اپنی بلند ہمتی اور پاکیزہ نسل کی بدولت۔

اور اس نے اپنے اصحاب کو اخلاص کے ساتھ اس کی طرف بلایا، جیسے ایک حنیف و کریم اور رہنمائی کرنے والا شخص بلاتا ہے۔

عاقل، شجاع، ادیب، اور (خوبیوں سے) آراستہ شخص وہ نہیں ہے جو محض پاکدامن، خیرخواہ اور محبت کرنے والا ہو۔

پھر اس کے بعد اس کا فرزند حسن، کامیاب ہوا، جو اس (پدر کی) پسندیدہ سنت پر عمل پیرا ہوا۔

کتنی ہی پڑھنے لائق نسخے اس (کتاب/اثر) کے ذریعے حاصل ہوئے، جو صاحبانِ عقل و فضیلت نے سن کر محفوظ کیے۔

اے پروردگار! اسے (مصنف/ممدوح کو) اپنے قریب کر اور اس کے ٹھکانے کو عزت عطا کر، اور اسے نبی محمد ﷺ کے گروہ میں محشور فرما۔

اور اس کے نیک فرزند حسن کی عمر ہمارے درمیان دراز فرما،حسود دشمنوں کے کینے اور بغض کے باوجود۔

اے ابو الحسن جوان! اس (کتاب/نسب/دین) کو مضبوطی سے تھام لو،اور بلندیوں کی طرف، کہکشاں تک، اوپر چڑھتے چلے جاؤ۔

جاگو (عبادت میں)، صلۂ رحمی کرو، روزے رکھو، ذکر کرو اور علم پھیلاؤ، محفوظ رہو، نیکی کرو، پاکیزگی اختیار کرو، سلامتی میں رہو اور سعادت حاصل کرو۔

10: قطب‌الدین محمد بن مسعود بن محمد الکیدری النیشابوری ، تاریخ وفات: 557 ھجری

نہج البلاغہ ہر سیدھے راستے پر چلنے والے کے لیے راہ ہے، اور ہر بلند مرتبہ، عظمت والے مرد کے مقصد تک پہنچنے کا راستہ ہے۔

اے وہ شخص جو شب بھر بلندیوں کو پانے کی فکر میں رہتا ہے، اس (کتاب) کا راستہ اختیار کر، تاکہ مطلوب کو پا لے اور مزید کمال حاصل کرے۔

یہ (کتاب) تمام علوم کی آنکھ ہے، ان سب کا جوہر اس میں جمع ہے، اور صاحبانِ بصیرت اس پر گواہی دیتے ہیں۔

اس کے معنی اور الفاظ کی روشنی چمکتے ستاروں سے بڑھ کر ہے، بلکہ دوپہر کے سورج کی مانند ہے— چاہے حسد کرنے والوں کو کتنا ہی ناگوار کیوں نہ ہو۔

یہ تمام علوم کا چشمہ ہے جو لوگوں کی طرف روانہ کیا گیا، تاکہ ہدایت پانے والا اس کی پیروی کرے۔

اس میں حقیقت و مقصد کے طالب کے لیے کفایت ہے، لہٰذا جویائے ہدایت کو لازم ہے کہ اسے اختیار کرے۔

اللہ درود بھیجے اس کے مرتب کرنے والے پر، جو اپنی کمالات اور اپنی محمدی نسبت کے سبب تمام لوگوں پر فائق ہے

11: افضل‌الدین حسن بن فادار قمی ، تاریخ وفات: چھٹی صدی کا آخر

جو شخص نہج البلاغہ کا مطالعہ کرتا ہے، وہ یوں لطف اندوز ہوتا ہے جیسے کوئی پیاسا گھونٹ گھونٹ ٹھنڈا پانی پیتا ہے— بلکہ اس سے بھی زیادہ لذیذ۔

وہ بلاغت کے چشمے سے سیراب ہونے والا ہے، جس کی بدولت دوست اور دشمن دونوں کی تشنگی بجھ جاتی ہے ۔

یہ ایک ایسے باغ کی سیر ہے، جس کے اطراف و کنارے دلائلِ محکم اور نکاتِ نادر سے روشن ہیں۔

اس کے میدانوں میں زندگی کی بارشیں پھیلتی ہیں، اور اس کے جھنڈے لہراتے ہیں جو ہر متلاشی آنکھ کو سیراب کر دیتے ہیں۔

اس پر الٰہی علم کی ایسی چھاپ ثبت ہے، جو ہر عیب اور نقاد کے اعتراض سے پاک و منزہ ہے۔

اس کے موتیوں میں نبوت کی خوشبو مہک رہی ہے، کیونکہ اس کا سارا فیض ایک ہی چشمے (وحیِ واحد) سے سیراب ہے۔

یہ بلاغت کے لباس کا قرین ہے، جو طالبین کے لیے تیار ہے، اور اس کے دروازے کے قفل ہدایت یافتہ لوگوں پر کھل جاتے ہیں۔

یہ مواعظ، تنبیہات، ہدایت کے راستے، فوائد اور یکجا بہتے ہوئے چشموں کی مانند فیوضات پر مشتمل ہے۔

12: حسن بن یعقوب بن احمد بن محمد نیشاپوری ، تاریخ وفات:517ھجری

نہج البلاغہ ایک ایسا صندوق ہے جس میں موتیوں کو سمیٹ لیا گیا ہے۔نہج البلاغہ ایک ایسا باغ ہے جس پر موتیوں کی بارش برسی ہے۔

ہج البلاغہ ایک معدن ہے جس میں سونےکا نقش ہے جسے خود (خدا کی) صنعت نے بُنا ہے،ریشم اور رنگین کپڑوں کی سجاوٹ کے بغیر۔”

یا پھر یہ ایک ایسا ڈبہ (عطر کی شیشی) ہے جو خوشبو سے بھر دیا گیا ہو، جب وہ کھولا جائے تو ہماری ناک میں ایسی خوشبو بھر جاتی ہے جس کی خوشبو ہر طرف پھیل جاتی ،ہے

میں نے آپ حضرات (اے میرے آقاؤں) کی تصدیق کی ہے، اور سچائی تو ہماری عادت ہے۔ اور یہ ایسی خصلت ہے جسے کسی بشر نے کبھی عیب نہیں کہا

خدا کی رحمت ہو اس بحرِ پر جس کے اندر موتی پوشیدہ ہیں، جس پر ہمارے سینوں نے ٹوٹ کر جھکاؤ کیا ہے، جیسے کہ چمکتا ہوا چاند اپنی روشنی بکھیرتا ہے۔

13: شاعر کا نام معلوم نھیں ہے

یہ کلام جب قیمت و قدر کے لحاظ سے موتیوں کے ساتھ تولا جائے، اور ایک دن حسن و جمال کے اعتبار سے موتیوں کی تعریف کی جائے، تو یہی کلام موتیوں کی حقیقت بیان کرتا ہے۔

اگرچہ یہ (کلام) عقلوں کو اپنی حیرت انگیزی سے مبہوت کر دیتا ہے، لیکن میں اسے جادو کہنا اپنی زبان کے شایانِ شان نہیں سمجھتا۔

14: شیخ جعفر الہلالی، تاریخ وفات:1440 ھجری

اے معرفت و عرفان کے معمارو! اسلامی ریاست میں تم ہی ہمارا محفوظ سرمایہ اور پائیدار ستون ہو۔

تم نے اس (اسلامی معاشرے) میں فکری انقلاب کو بھڑکایا ہے، ایک ایسی بیداری جس کے گرد زمانہ گردش کر رہا ہے۔

اللہ تمہاری اس کوشش میں برکت ڈالے، اور تمہیں اسی خوشی و مسرت سے نوازے۔

یقیناً تمہارا (امام) علی کے "نہج” کو زندہ کرنا، حقیقت میں ایک قیمتی سرمایہ اور شکریہ کے لائق کامیابی ہے۔

آج کے دن کے لیے یہ محض بلاغت کا راستہ نہیں، بلکہ علم کا وہ گہرا اور وسیع سمندر ہے۔

یہ تو پختہ اور بلند عقیدے کا راستہ ہے، جس کی گونج سے کفار اور انکار کے قلعے ڈھے جاتے ہیں۔

یہ آداب اور بلند اخلاق کا راستہ ہے، جس سے روح جلا پاتی ہے اور ضمیر نکھرتا ہے۔

یہ حکمرانی کا راستہ ہے جو سیاستوں کو بنیاد بخشتا ہے، اور جس کا نظام ہدایت کو اپنا دستور بناتا ہے۔

یہ در حقیقت "نہج البلاغہ” ہے، جس کا بیان علیؑ کے قلم سے ثبت ہے۔

کمال تعجب ہے کہ ایسا عظیم سرمایہ اور وسیع تراث (ورثہ) کنارے لگایا جائے، اور اس کے سوا دوسری چھوٹی چیزوں کو (اہمیت دی جائے اور) نوش کیا جائے۔

آخر وہ کیا تھا جو علیؑ نے اس قوم کے خلاف کیا، کہ ان کے سینے (کینہ و بغض سے) جل اٹھے؟

کیا وہی حق جسے علیؑ نے سنبھالا اور قائم رکھا، ان کے لیے کڑوا تھا؟ جبکہ منکر اور جاحد لوگ زیادہ تھے۔

افسوس اس امت پر کہ اس نے اپنی عقل و خرد کو ضائع کر ڈالا، اور جا کر سراب کے پیچھے چلنے لگی۔

حالانکہ اس کے پاس فکری انقلاب کی وہ دولت موجود تھی جو کافی تھی، لیکن کہاں ہے وہ سننے والا اور دیکھنے والا؟

وہ (امت) حقیقت سے اندھی ہو کر راہ میں بھٹک رہی ہے، جبکہ اس کے اپنے گھر میں چراغِ منیر (نہج البلاغہ) روشن ہے۔

وہ دور دراز کی چھوٹی ندیوں کو ڈھونڈنے لگی، جبکہ اس کے پہلو میں سمندر بہہ رہے تھے۔

یقیناً یہی تو خسارہ ہے! اور کیا کبھی وہ قوم کامیاب ہو سکتی ہے جس کے اندر شعور مر چکا ہو؟

15: شیخ احمد بن محمد بن جعفر بن احمد البحرانی الأوالی ، تاریخ وفات: آٹھویں صدی کی ابتداء

ھج البلاغہ ایک رہنما راستہ ہے، خاص طور پر امام کے محبین کے لیے؛ یہ ایسا سرچشمہ ہے جو اللہ کے نور کے چراغ سے روشن ہوا ہے، اور جس نے اس کا نظارہ کیا وہ روشنی پاتا ہے۔

اس میں پیچیدہ ترین علمی مسائل کے حل موجود ہیں، پس جو اس سے سیراب ہوتا ہے وہ کامیابی و فتح پاتا ہے۔

جب ان الفاظ پر غور کرو جو اس میں جُڑے ہیں، تو انہیں خالص یاقوت یا موتیوں کی مانند سمجھو۔

اور اگر فکر کی آنکھ سے دیکھو تو کہو گے: یہ وہ پرچم ہے جس کے ذریعے اسلام کو نصرت ملی۔

تلوار علیؑ کی تھی اور گفتار بھی، دونوں ساتھ، تو بتاؤ، اور کس نے یہ فضیلت پا کر فخر کیا؟

کیا نہیں کہا تھا تمام مخلوقات کے سب سے برتر (پیغمبرؐ) نے: حق ہمیشہ علیؑ کے ساتھ ہے، جہاں بھی وہ ہوں۔

خدا کی قسم! حسد کرنے والوں نے اس سے کوئی بے نیازی نہ پائی، بلکہ ان کی روشنی اس کے نور کے مقابلے میں ناقص ہے۔

جیسے چمگادڑ کی آنکھوں کو دن کی روشنی بند کر دیتی ہے، یوں ان کی نگاہیں بھی اندھی ہو جاتی ہیں۔

میرے مولا نے کبھی تیری کسی فضیلت کو نہیں بھلایا، جو تجھے تیری جدوجہد کے صلے میں عطا کی گئی۔

واہ! اور کیا تعجب ہے اُس شخص کی بات پر، جو اس چراغ کو سورج اور چاند کے برابر قرار دیتا ہے۔

16: ابو محمد بن شیخ صنعان، تاریخ وفات:گیارھویں صدی کا آخر تقریبا

نہج البلاغہ ایک ایسا باغ ہے جو بارانِ رحمت سے سیراب ہے، اور جو اللہ کے جمال کے انوار سے روشن ہے۔

یا یہ ایک قدسی حکمت ہے جو آشکار ہوئی، اور دیکھنے والوں کے لیے اللہ کی ذات کا آئینہ بن گئی۔

یا یہ معرفت کا وہ نور ہے جو چمکا، اور اس نے تمام جہانوں کے لیے نیکوکاروں کے راستے روشن کر دیے۔

یا یہ رحمت کا ایک سمندر ہے جو علم کے ساتھ طلوع ہوا، اور انوار کی موجوں سے لبریز ہے۔

یہ خطبات ایسے ہیں جن کے الفاظ گوہرِ درّ کی مانند ہیں، اور جن کا سرچشمہ معارف کے دریا سے بہہ رہا ہے۔

اس کے کلمات یوں ہیں جیسے جنت کی بہار،جنہیں توحید کے انوار نے گھیر رکھا ہے۔

گویا یہ ’’عین الیقین‘‘ ہے جو پھوٹ نکلا، عرشِ خدا کے اوپر سے بہنے والی نہروں کی طرح۔

اس کی حکمتیں ستاروں کی مانند درخشاں ہیں، کیونکہ ان میں اسرارِ ربانی کا نور پوشیدہ ہے۔

اس کے بیانات پردے ہٹا دیتے ہیں، گویا یہ سننے والوں کے لیے آنکھوں کی بینائی ہیں۔

اس کے مختصر کلمات جامع و مانع ہیں، جو تمہیں کئی لمبی کتابوں اور سفرناموں سے بے نیاز کر دیتے ہیں۔

اس کے الفاظ دل کی سیاہی کو کھینچ لیتے ہیں، اور دل کو دن کے اجالے کی طرح روشن کر دیتے ہیں۔

اس نے مفہوم کی تاریکی کو روشن کر دیا، گویا صبح طلوع ہوئی ہو، اور حق گو نے سب کچھ آشکار کیا ہو۔

یہ ہر عقلِ کامل کی ملکہ ہے، جو انسانی فکر کی بلندیوں سے بھی بلند پیاس بجھاتی ہے۔

ایسی ہے کہ بڑے بڑے بلیغ اس کے آگے عاجز ہیں، کیونکہ اس کی بلاغت ہی حجتِ قطعی ہے۔

جب تو اس کلام کو غور سے دیکھے گا، تو دیکھے گا کہ یہ علمِ باری کی زبان سے نکلا ہے۔

تو ایک سمندر دیکھے گا جو حقائق سے لبریز ہے، جس کی موجوں پر علوم کی کشتیاں چل رہی ہیں۔

وہ ایک وسیع سرزمین ہے، جو بارش کی طرح سب کو سیراب کرتی ہے۔

وہ عفو اور سخاوت کا منبع ہے، اور ایسی قدرت ہے جو تقدیروں سے برتر ہے۔

وہاں ایک جاری تقدیر دکھائی دیتی ہے، جو قہار واحد کی کبریائی سے صادر ہوئی ہے۔

یہ وہ قدر ہے جو اپنی صفات و نشانیوں میں، آثار میں اللہ کی ذات سے جڑا ہوا ہے۔

یہ وہ چراغ ہے جو اللہ کے نور سے منور ہے، ہدایت کا سرچشمہ ہے، اور جو ہر پوشیدہ راز کے خزانوں کو آشکار کر دیتا ہے۔

یہ رسول کا ہمسر ہے اور سب سے پہلا مؤمن، جس نے اللہ کی بندگی کی جیسے خود برگزیدہ مصطفی ﷺ نے۔

اور اسی کے ذریعے اللہ نے اپنے نبی کا دین قائم کیا، اور اپنے نیک بندوں پر اپنی نعمت کو کامل کر دیا۔

17: بولس سلامہ (Paul Salameh)

یہ ہاتھ علوم و حقائق کا دروازہ ہے، جو اسرار کے شہر کی روشنی سے روشن اور کھلا ہوا ہے۔

یہ ہر نقطہ وہر نکتہ کو ایک روشن اور واضح کتاب میں بکھیرتی ہےجو منتخب نہج البلاغہ کی کتاب ہے

یہ ایک ایسا باغ ہے جس میں ہر قسم کے چنے ہوئے پھول ہیں، جسے آسمان نے بہار کے اندر ظاہر کیا ہے۔

اس میں گلاب جیسے پھول کی تازگی ہے، اور اس میں خزامی، چمبیلی اور انار کے پھول ہیں

18: سید صدرالدین علی بن ناصر الحسینی السرخسی

اے نہج البلاغہ! تجھ پر اللہ کی رحمت و برکت ہو، یہ وہ راہ ہے جس کا سالک جہالت کی گہری کھائیوں سے نجات پا لیتا ہے۔

تُو نے روشن ستاروں کی مانند انوار اپنے اندر سمو رکھے ہیں، لیکن تیرا منکر گمراہ ہو گیا، اور وہ سیدھی شاہراہوں سے بھٹک کر ٹیڑھی راہوں پر چل نکلا۔

یقینا تُو ایک قیمتی موتی ہے اور اللہ ہی تیرا مرتب کرنے والا ہے، اور تُو ایک شاداب و سرسبز باغ ہے اور اللہ ہی تیرا پیدا کرنے اور بُننے والا ہے۔

19: شاعر کا نام معلوم نھیں ہے

نہج البلاغہ میں ہر فضیلت جمع ہے، اور تمام کتابیں بالآخر اسی کی طرف رجوع کرتی ہیں۔

اس میں جامع حکمتیں اور فصاحتیں ہیں، جن سے غافلوں کی آنکھیں محروم اور اندھی ہیں۔

اس کے معانی ’’عین الیقین‘‘ کے گرد گھومتے ہیں، اور اس کے الفاظ گویا کتابِ خدا کی مشکاۃ سے نکل کر بولتے ہیں۔

یہ ایسی کتاب ہے جس کے الفاظ کو اللہ نے آراستہ کیا ہے، قرآنِ مفصل کی آیات کے جواہرات سے۔

اس میں ایسی حکمتیں ہیں جو وحی کی مانند معجزانہ بولتی ہیں، فرق صرف یہ ہے کہ یہ نازل شدہ وحی نہیں ہے۔

نہج البلاغہ علم اور عمل کا راستہ ہے، پس اے دوست! اس پر چلو تاکہ تم اعلیٰ امیدوں کی منزل کو پا سکو۔

اس میں کتنی ہی ایسی مضبوط حکمتیں ہیں جو حق پر قائم ہیں، جو دلوں کو زندہ کرتی ہیں اور مثالوں سے لبریز ہیں۔

اس کے الفاظ موتی ہیں جن کی زینت نے اہلِ فضیلت کو غنا بخشا، انہیں زیورات اور لباسِ فصاحت سے بے نیاز کر دیا۔

اور اس کے معانی سے ہدایت کے انوار چمک اٹھے، جن کے ذریعے گمراہی اور لغزش کے اندھیرے چھٹ گئے۔

اور کیوں نہ ہو، حالانکہ یہ وہ نہج ہے جس کا راستہ پاکیزہ ہے، اور جس کی طرف ہدایت دینے والے امیرالمؤمنین علیؑ ہیں۔

20: شیخ ڈاکٹر احمد الوائلی، تاریخِ وفات: 1424ھجری

اے قلم! جو علیؑ کے نہج سے گلاب تراشتا ہے، یہ نہج ایک عظیم الشان کتاب ہے۔

فصیح الفصیح اس بات کی دلیل ہے کہ یہ علیؑ کا کلام ہے، کیونکہ ہر جملہ خود علیؑ کی طرف اسناد کی شہادت دیتا ہے۔

یہ بیان میں سورج کی مانند ہے، جس کا نہ کوئی فانوس ہم پلہ ہو سکتا ہے نہ چراغ۔

اس کی عبارت اور معانی دونوں لاجواب ہیں، یوں لگتا ہے جیسے حروف خوشبو اور بہار میں ڈھلے ہوں۔

ہر فصل میں ابو ترابؑ کی شخصیت نمایاں ہو جاتی ہے، اور اس کے الفاظ کی گرج سے دل و جان لرز اٹھتے ہیں۔

لیکن بیمار دل یہ چاہتے ہیں کہ حقائق کو گمراہ کن تاویلات سے چھپا دیں۔

انہوں نے دعویٰ کیا کہ یہ سید رضیؒ کی تصنیف ہے! ذرا ٹھہرو— کب بچہ شیر کی گرج کی مانند ہو سکتا ہے؟

ان کی باتوں کی پروا نہ کرو، کیونکہ یہ ایسی نہیں کہ جرح و تعدیل کے معیار پر بھی پرکھی جا سکیں۔

یہ سب ان کی عاجزی اور کمزوری ہے، ورنہ کمزور کا مضبوط پر حسد کے سوا اور کیا ہے؟

نہج البلاغہ کے مصادر نے وضاحت سے ذکر کیا ہے، ان باتوں کو رد کرنے میں جو معاند اور جاہل کہہ بیٹھے۔

محققین نے سمجھ لیا کہ یہ نسبت دینا کہ یہ سید رضیؒ کا کلام ہے، ایک کمزور اور باطل دعویٰ ہے۔

لیکن حاسدوں نے سچائی کو دیکھنے سے انکار کیا، اور صرف کجی و کینہ کی آنکھوں سے دیکھا۔

اگر یہ نہج ابو سفیان کا ہوتا، تو وہ بغیر دلیل ہی قبول کر لیتے۔

لیکن حقیقت یہ ہے کہ نہج صرف علیؑ کی ہے، اور علیؑ کی ذات دنیا کے لیے بھاری ہے۔

21: عبد الباقی العمری، تاریخ وفات: 1204 ھجری

خبردار! یہ کتاب "نہج البلاغہ” ہے، جو معرفت و عرفان کے طلبگار کے لیے بالکل واضح راستہ ہے۔

یہ آلِ حرب (یعنی بنی امیہ و دشمنانِ علیؑ) کی چوٹیوں سے بلند ہے، جیسے ایک عظیم چٹان کو اوپر سے سیلاب نیچے گرا دے۔

22: شاعر کا نام معلوم نھیں ہے

نہج البلاغہ سالکوں کو رہنمائی دینے والا ہے، جو اُنہیں قول و عمل دونوں میں حق کے مقامات تک پہنچاتا ہے۔

پس تم اس کے راستے پر چلو تاکہ کل تم دارالسلام (جنّت) کی طرف ہدایت پاؤ، اور وہاں وہ سب کچھ حاصل کرو جس کی تم امید رکھتے ہو۔

23: عبد الواحد النعمانی، تاریخ وفات: 433 ھجری

یہ کلام سینوں کے لیے شفا ہے اور تائید یافتہ ہے، وحی سے ماخوذ ہے مگر قرآن نہیں ہے۔

لیکن اس میں وہ سب کچھ موجود ہے جو قرآن سے ہم آہنگ ہے، اس کی فصاحت نے ہر انسان کو عاجز کر دیا ہے۔

24: شاعر کا نام معلوم نھیں ہے

یہ کتاب، جس میں نہج البلاغہ کا کلام ہے، اس کے الفاظ پر الٰہی نور کے تاج جگمگا رہے ہیں۔

یہ وحی سے ماخوذ ہے، اس جیسا کوئی کلام نہیں آیا، کیونکہ اس میں ایسی روحِ فصاحت ہے کہ کوئی انسان اس کی برابری نہیں کر سکتا۔

25: شاعر کا نام معلوم نھیں ہے

نہج البلاغہ تمام مخلوق کے درمیان ایک حجّت/قطعی دلیل ہے، اور اسی کے ذریعے عقیدۂ ایمان درست اور برقرار رہتا ہے۔

اگر یہ بلیغ وحی (کے مانند) نہ ہوتا تو اس کے معانی قرآن سے ماخوذ نہ ہوتے۔

یہ اُن (جلیل) کتابوں کے درمیان پانچواں مانند ہے جو مختلف انبیاء اور ادیان کے سلسلے میں آتی رہیں۔

اس میں تورات و انجیل کی حکمت، زبور کی فضیلت اور فرقانِ مجید (قرآن) کی شوکت و عظمت جلوہ گر ہے۔

اس کی تنبیہیں سرکشوں کے لیے ہیں، اور اس کی توضیحات ہدایت پانے والوں کے لیے—صریح نص اور روشن برہان کے ساتھ۔

یہ ایک معجزہ ہے؛ کوئی مخلوق اس جیسا نہیں لا سکی، اور اس کے اشارے اور کھلا بیان ہی اس کے حق ہونے کو کافی ہیں۔

26: عبد المسیح الانطاکی ، تاریخ وفات: 1341 ھجری

یقیناً فصاحت کبھی کسی زبان داں کے آگے نہیں جھکی، چاہے وہ عرب ہو یا عجم۔

لیکن اپنی تمام زیبائی کے ساتھ فصاحت جھک گئی اور سر تسلیم خم کیا، مرتضیٰؑ کے بلیغ و خطیب کلام کے آگے، جو اس کا حقیقی راعی ہے۔

یوں لگتا ہے کہ فصاحت گویا انہی کے لیے پیدا کی گئی، اور وہی ہیں جنہوں نے اسے عدم سے وجود بخشا۔

انہوں نے اپنے سے پہلے کے تمام فصحاء کو پیچھے چھوڑ دیا، ان کی بلاغت کی روایات آج بھی لوگوں کی زبانوں پر ہیں۔

اور ان کے بعد کسی طالبِ فصاحت کے لیے کوئی راہ باقی نہ رہی، کہ اگر کوئی چلنا بھی چاہے تو اس میدان میں سبقت پہلے ہی وہ لے چکے ہیں۔

انہوں نے قُسّ بن ساعدہ جیسے مشہور خطیب کا ذکر تک مٹا دیا، حالانکہ وہ اپنی فصاحت کی وجہ سے معروف تھا اور خطبوں کا ذکر تک مٹا دیا جو وہ بیان کرتا ۔

ہاں! ان کی فصاحت ایسی ہے کہ کوئی اس کا ہمسر نہیں، اور میرے لیے بس یہی کافی ہے کہ علیؑ ہی اس کے خالق ہیں۔

بے شک وہ بلا شبہ فصحا کے سردار ہیں، جن کے اقوال کے موتی آج بھی بکھرے ہوئے ہیں

یہ (نہج البلاغہ) تمام مخلوق کے اقوال سے بلند ہے، ہاں مگر خدا کے کلام سے کمتر ہے جو اس کا خالق ہے۔

یہ ایسا کلام ہے کہ جب تلاوت کی جاتی ہے تو دلوں کو سحر کر لیتا ہے، لیکن وہ سحر حلال ہے جو پڑھنے والے کی روح کو گھیر لیتا ہے۔

یہ لوگوں کے دروازے پر پیش کی جانے والی شراب کی مانند ہے، جو شراب کی طرح سرور بخش ہے لیکن ساقی کے لیے بلا گناہ۔

یہ شرع کی گردن کے لیے موتیوں کے ہار کی مانند ہے، جو اپنے جواہرات سے مزین و مزین کرنے والی ہے۔

یہ حسن و جمال میں دلہنوں کی مانند ہے، جو اپنی زینتوں سے دنیا کو خیرہ کر دیتی ہیں۔

اس کی تلاوت، خدا کی قسم، کانوں کو اس قدر سرور بخش ہے، جیسے پرندوں کے نغمے بھی اس کی نقل نہ کر سکیں۔

جو اسے پڑھتا ہے وہ اپنی ذمہ داریوں سے محو ہو جاتا ہے، اس کے بہاؤ میں دنیا اور اس کی لذتوں کو بھول جاتا ہے۔

اس میں روشن نصیحتیں، عظیم حکمتیں، اور درخشاں اخلاق سب جمع ہیں۔

اس میں وہ احکام بھی ہیں جو قرآن کی آیات کی وضاحت کرتے ہیں، جیسا کہ خدا نے چاہا اور وحی نے بیان کیا۔

وہ اپنے بلند معانی کو ایسے الفاظ میں سجاتے تھے، جو ان کے شایانِ شان اور عظمت بخشنے والے ہوتے تھے۔

وہ (علیؑ) یہ کلمات فی البدیہہ بغیر کسی تکلّف کے جاری کرتے تھے، منبروں پر لوگوں کے سامنے اور ان کے دلوں کو جھنجھوڑتے تھے۔

اسی طرح ان کے عظیم خطوط بھی بلا تکلف تھے، جو ستاروں کی طرح روشن اور مزین تھے۔

قسم ہے تیری! یہ ایک ایسا خزانہ ہے جو کبھی ختم نہیں ہوگا، اور عربوں کے لیے فصاحت کا ایسا سرمایہ ہے جو انہیں کافی ہے۔

لوگوں نے اسی سے فصاحت سیکھی، لیکن یہ ہر اُس شخص کو عاجز کر گئی جو اس کا مقابلہ کرنا چاہتا۔

اسی بات کا اعتراف اہلِ فن نے بھی کیا، اور اتفاقِ رائے سے اس بارے میں اپنے فتوے صادر کیے۔

خدا کی قسم! کیا کبھی حیدرؑ کے اقوال سے زیادہ واضح اور فصیح کوئی چیز دیکھی گئی ہے؟ یا ان کے معانی کے برابر کچھ پایا گیا ہے؟

خواہ وہ منظوم ہو یا منثور، اہلِ دانش نے ہمیشہ ان کے مختلف پہلوؤں سے فائدہ اٹھایا ہے۔

اگر تقویٰ رکاوٹ نہ ہوتا تو میں کہتا: یہ گویا منظم آیات ہیں جن میں ہدایت بہتی ہے۔

اور یہی ہے وہ تحریر جو ’’نہج البلاغہ‘‘ میں مدوّن ہوئی، جس کے ذریعے اس کے قریب آنے والے ہدایت پاتے ہیں۔

اور ہمارے لیے کافی ہے جو ہم نے صحابہ کے آثار میں دیکھا، جو اس عظیم ہستی (علیؑ) کے چھوڑے ہوئے کلام کی مانند ہیں۔

وہ (صحابہ) دینِ خدا کے ان سرچشموں پر انہی کے ساتھ وارد ہوئے، اور خود مصطفیٰؐ ان کا جاری کرنے والے تھے۔

پس اگر کوئی ڈرے بغیر کہے تو کہہ سکتا ہے: ان کی فصاحت انسانوں کے لیے ایک معجزہ ہے، جسے کوئی رد نہیں کر سکا۔

ایک دن ایک شخص معاویہ کے پاس آیا، ایک ہجوم میں جسے وہ بڑھاوا دینا چاہتا تھا۔

اس نے کہا: میں تمہارے پاس اس شخص کے پاس سے آیا ہوں جو سب سے زیادہ عاجز ہے! اے فصاحت کے آقا! مجھے اس کے کلام کی مانند کچھ سنا دو۔

معاویہ نے کہا: افسوس تم پر! کیا تم حیدرؑ پر کم عقلی اور عاجزی کا الزام لگاتے ہو؟یہ تو جھوٹ اور فریب ہے۔

اس امت کے لیے (حتیٰ کہ قریش کے لیے بھی) فصاحت کے قوانین صرف انہی (علیؑ) نے مرتب کیے۔

ان کے وہ اقوال بالکل حق ہیں جو ان کی مجلس سے فی البدیہہ صادر ہوئے، اور کوئی انہیں چھپا نہ سکا.

اور کسی شخص کے لیے سب سے بڑی فضیلت وہ ہے، جسے اس کے دشمن بھی مانیں اور اپنی محفلوں میں نقل کریں۔